سان ستيفانو - Untrue Stories

#اسكندرية #مصر #سان_ستيفانو #فورسيزون #san_stefano #four_seasons #Alexandria #grand_plaza
يخرب مطنكم على مطن اسرائيل
#احمد_بحيري مع الحدوتة ....
وتحبيشه ابو الليالي يوماتي ينزل البلد هو ورجالته وهاتك يا نهب وسرقه و حرق والحكومة يابه الحاج مش عارفه تاخد معاه لا حق ولا باطل، واهل البلد يجتمعوا وحليله المزين يقول مفيش غير حل واحد ياجدعان، ايه هوه يا حليله؟! قالك اننا عدم المؤاخذة نقتله ! ونقتل الو الليالي ازاي يعني؟ والمطيباتي يقول اول هام نشتري السلاح ونلم من بعض يابه الحاج ونبيع اللى ورانا واللى قدامنا ونشتري طبنجة، والمطيباتي يقول تانى هام ندور على عيل مجيبتهوش ولادة ياخد السلاح ويطخه، والواد شناوي ابو صدر عريض يطلع ويقول انا هطخه يا مطيباتي! والمطيباتي يقول انت ايه ياجعر هى هتعيل ولا ايه ؟! احنا عايزين واحد له تاريخ،،،
نقوله طب مين يا مطيباتي ؟ قالك مفيش الا السناري ابو حجيجه ! ده ياما قتل انجليز ايام الاحتلال وياما هتف ضد الملك بقلب حديد، كان بيهتف ويقول ارجع انقره يا فاروق يابن المره!!!
ده نلاقيه فين يا مطيباتي ؟ قالك نقلب عليه الناحية، ومنكدبش خبر يابه الحاج، ونهمل بيوتنا وندور ع السناري لحد ما نلاقيه يا ولداه عجوز ومكحكح ونايم في الخرابه، ونهلل ونهيص وناخده معانا بس الاكادة السناري مبقاش يشوف ولا بيسمع والرعشة ماسكة جتته وصوت كحته جايب اخر الزمام ونديله الطبنجة يابه الحاج، وناخده لحد ابو الليالي والحاج فولي يشوفنا واحنا مسندينه وماشيين ويضحك ويقول خليكوا عايشين في اللي فات يا بلد مطنات،،،
عنها يابه الحاج والسناري يقف قصاد ابو الليالي وايده ترتعش والسلاح يقع ع الارض تحت منه، وعدم اللامؤاخذة يعملها ع روحه ويغرق الارض وينجس السلاح، يادي الخيبة ياولاد !!! اكنا مانبناش غير الخسارة ونجاسة السلاح! والنكد يركبنا يابه الحاج ونقعد حزانا ونمصمص شفايفنا والمطيباتي يدور في الدفاتر القديمة لاجل ما يلاقلنا بطل تانى، والحاج فولي يضحك ويضحك لحد ما عينه تدمع يابه الحاج... وبكرة العدل هيبقي للركب... ونشوفكم ع خير 😃

Stories